સુરતમાં હિટ એન્ડ રન: એક્ટિવા પર જતી 2 બહેનને ડમ્પરે અડફેટે લીધી, 22 વર્ષીય યુવતીનું કચડાતાં મોત

Surat Hit and Run: ગુજરાતમાં હિટ એન્ડ રનની ઘટના(Surat Hit and Run) દિવસેને દિવસે સામન્ય બનતી જાય છે, ત્યારે આવી જ એક ઘટના સુરતના મોટા વરાછા વિસ્તારમાં બની જેમાં બેફામ બનેલા ડમ્પર ચાલકે મોટા વરાછાા લેક વ્યુ ગાર્ડન પાસે પ્રતિબંધિત સમયમાં મોપેડ ઉપર પસાર થતી બે બહેનોને અડફેટમાં લેતા 22 વર્ષીય યુવતીનું મોત નીપજ્યું છે.જેના કારણે તેનો પરિવાર શોકમાં ગરકાવ થયો છે અને ડમ્પર ચાલક વિરુદ્ધ કડક કાર્યવાહીની માંગ કરી રહ્યો છે.

એકટિવા ચાલક યુવતીને સારવાર અર્થે હોસ્પિટલ ખસેડાઈ હતી
સરથાણાના શ્યામધામ ચોક સમ્રાટ રો- હાઉસ ખાતે રહેતી 22 વર્ષીય નમ્રતા જગદીશભાઈ કોટડીયા રવિવારે સવારે પિતરાઈ બહેન માનસી માંગરોળીયા સાથે મોપેડ પર ઘરેથી મોટા વરાછા ખાતે આવેલા એક ક્લિનિક પર જવા માટે નીકળ્યા હતા. દરમિયાન મોટા વરાછાના લેક ગાર્ડન નજીક કમિશનરના જાહેરનામા અંતર્ગત પ્રતિબંધિત સમયમાં બેફામ દોડતા એક ટ્રક ચાલકે મોપેડને ટક્કર મારી અડફેટમાં લઇ લીધા હતા.

ટ્રાફિક પોલીસની બેદરકારી છતી થઈ
પાછળથી ડમ્પરે અડફેટે લેતા મોપેડ પરથી બંને બહેનો નીચે પટકાઈ હતી. જેમાં પિતરાઈ બહેન માનસી રસ્તા પર પડી હતી. જ્યારે નમ્રતા ડમ્પર નીચે આવી જતાં પાછળના બંને ટાયર તેની પરથી ફરી વળ્યા હતા. ગંભીર રીતે ઘવાયેલી નમ્રતા અને માનસીને સારવાર માટે 108 દ્વારા પી. પી. સવાણી હોસ્પિટલમાં દાખલ કરવામાં આવી હતી જ્યાં ટૂંકી સારવાર બાદ નમ્રતાનું મોત નીપજ્યું હતું. આ મામલે ટ્રાફિક પોલીસની બેદરકારી છતી થઈ હોવાનો સૂર ઉઠ્યો છે.

ડ્રાઈવર ડમ્પરને આગળ સુધી ભગાડી ગયો હતો
અકસ્માત બાદ ડમ્પરનો ડ્રાઈવર ડમ્પરને આગળ સુધી ભગાડી ગયો હતો અને ત્યારબાદ રસ્તાની બાજુમાં ડમ્પરને ઉભુ રાખીને ત્યાંથી નાસી ગયો હતો. બનાવની જાણ થતાં ઉત્રાણ પોલીસ ઘટના સ્થળે દોડી ગઈ હતી. પોલીસે બનાવ અંગે અજાણ્યા ડમ્પરચાલક વિરૂધ્ધ ગુનો નોંધ્યો છે અને સીસીટીવીના આધારે પોલીસે ટ્રક ચાલકને ઝડપી પાડવાના ચક્રો ગતિમાન કર્યા છે.